Երեկ Համբույրի միջազգային օրն էր
Հույն պատմագիր Հերոդոտոսի աշխատություններից մեկում նկարագրված է հասարակական վայրում իրեն չզսպող եւ համբուրվող տղամարդը. նրան հենց դեպքի վայրում գլխատում են:
Մեր օրերում համբույրի համար չեն գլխատում, հակառակը՝ օրեցօր անցկացվում են համբուրվողների համար հատուկ մրցույթներ, ամենագեղեցիկ, ամենառոմանտիկ ու ամենավարակիչ համբուրվող զույգերը խրախուսական մրցանակներ են ստանում:
Երեկ ամբողջ աշխարհում նշվում էր Համբույրի միջազգային օրը: Սպասված օրը խորհրդանշական էր հիմնականում սիրահարված արտասահմանցիների համար: Օրինակ՝ www.youtube.com կայքում արտասահմանցի մի զույգ այնքան երկար է համբուրվել, որ ամբողջ այգին «վարակել» է, համբուրվել են նույնիսկ անծանոթները:
Ճիշտ է՝ տոնը միջազգային է, բայց հայ երիտասարդներից շատերը նույնիսկ չգիտեին էլ, որ աշխարհում նման տոն գոյություն ունի: Ասենք ավելին՝ համբույրի մասին գրվել է եւ դեռ շարունակվում են գրվել լուրջ ատենախոսություններ, հիմնավոր պարզաբանումներ ու նաեւ հետաքրքիր փաստեր:
Ըստ «Նյու Յորք թայմս» թերթի, վերջերս բազմաթիվ երկրներում հաղորդումներ են հրապարակվել օրգանիզմի վրա համբույրի հիանալի առողջապահական ու կազդուրիչ ազդեցության մասին: Պարզվել է, որ համբույրը միանգամայն ի զորու է ուժեղացնելու ավանդական դեղորայքի ներգործությունը, նույնիսկ փոխարինելու դրանց` բազմաթիվ տկարությունների դեպքում:
Իսկ ահա Վիեննայի համալսարանի կանանց կլինիկայի մասնագետները պնդում են, որ համբույրը օգնում է հաղթահարել սթրեսը: Պարզել են, որ համբուրվելիս ուղեղում ուժգնորեն արտադրվում են դրա համար անհրաժեշտ նյութեր:
Համբույրի բուժիչ ազդեցության միանգամայն նոր եզր են բացահայտել Քլանգենֆուրտի (Ավստրիա) ընդհանուր բժշկության ակադեմիայում. «Համբույրը պատվաստանյութի տարատեսակ է, որը փոխադարձաբար միմյանց են պատվաստում երկու սիրեցյալներ»:
Հիշեցնենք, որ Հելլադայի պոետները վկայել են, որ համբույրը Աստծո պարգեւն է` «հոգիների փոխանակություն»:
Ի դեպ, «ամենաշահագործվող» համբույրն աշխարհում ֆրանսիականն է, որը, ըստ գիտնականների տարիների փորձի՝ ապացուցում է, որ այն թե՛ առողջությանն է օգտակար, թե՛ գերագույն հաճույք է պատճառում:
Եվ, վերջապես, այդ «դեղը» ոչ մի գնով չես գնի դեղատնից, այն կարող է նվիրել միայն մտերիմ մարդը:
