«Ա-ինֆո» գործակալությունը տեղեկացնում է, որ 2010-2011 ուսումնական տարում Ջավախքի հայկական դպրոցներում մի շարք փոփոխություններ են նախատեսված: Մասնավորաբար՝ հայոց լեզվի եւ գրականության դասաժամերը կրճատվելու են՝ իրենց տեղը զիջելով վրացերենին: Հայերեն վարվող բոլոր դասընթացներն այսուհետեւ կանցկացվեն երկլեզու. դասերի առաջին կեսը մասնագետները կվարեն հայերեն, երկրորդ կեսը՝ վրացերեն: Դպրոցներում մինչ այս գործող լաբորատորիաները, բուժկետերը, երգի- պարի խմբակները, նախնական տվյալներով նաեւ գրադարանները այլեւս չեն գործի: Հայոց պատմության դասաժամերը, ինչպես վերջին մի քանի տարիներին, ֆակուլտատիվ հիմունքներով են անցկացվելու, կրճատվել են նաեւ կենսաբանության, քիմիայի եւ ֆիզիկայի դասաժամերը:
Չնայած տեղական իշխանության ներկայացուցիչների այն պնդումներին, որ հայազգի ոչ մի ուսուցիչ չի զրկվելու հետագա մասնագիտական գործունեություն ծավալելու հնարավորությունից՝ դասաժամերի զգալի կրճատումներն այլ բանի մասին են վկայում:
Ջավախքի դպրոցների համար կարեւոր խնդիր է դարձել նաեւ դասագրքերի ձեռքբերման հարցը: Հայաստանում հրատարակվող եւ անվճար տրամադրվող հայալեզու դասագրքերն արդեն մի քանի տարի է, ինչ անհասանելի են ջավախահայ աշակերտներին: Նրանք ստիպված են Վրաստանում լույս ընծայվող հայալեզու դասագրքերը ձեռք բերել բավականին թանկ գնով, իսկ այս դասագրքերը աչքի են ընկնում անհաջող թարգմանությամբ, բազում տառասխալներով, խրթին շարադասությամբ, շատ դեպքերում՝ նաեւ աղավաղված բովանդակությամբ: Խոսքը հատկապես վերաբերում է Վրաստանի պատմությունը ներկայացնող դասագրքերին, որոնք հայ աշակերտին ներկայացնում են հայոց պատմությանն առնչվող աղավաղված քարտեզագրություն, պատմական իրադարձություններ եւ այլն:
