Ամերիկացիների 41%-ը սպասում է մինչեւ 2050թ. Փրկչի երկրորդ գալստյանը, 46%-ը կարծում է, որ դա տեղի չի ունենա: Այդ մասին է վկայում ամերիկյան «Պյու» հետազոտական կենտրոնի անցկացրած հարցումը:
Դրանից բացի, պատասխանողների 71%-ը կարծում է, թե XXI դարի կեսին քաղցկեղը լիովին բուժելի կլինի, պրոթեզներն ավելի լավ կգործեն, քան թե իսկական ձեռքերն ու ոտքերը, իսկ 81%-ը կարծում է, թե համակարգիչները կսկսեն մարդկանց նման խոսել: Հարցվածների 58%-ը մոտակա 40 տարում սպասում է երրորդ համաշխարհային պատերազմի, իսկ 53%-ը չի բացառում Միացյալ Նահանգների վրա ահաբեկչական հարձակումը՝ միջուկային զենքի կիրառմամբ:
Ամերիկացիների 53%-ը հավատում է, թե սովորական մարդիկ կկարողանան ճանապարհորդել տիեզերքում, 74%-ը կարծում է, թե մարդկությունը կկարողանա էներգիա ստանալ՝ առանց ածուխ, նավթ եւ գազ օգտագործելու: Մինչդեռ 72%-ն ակնկալում է, որ մինչեւ 2050թ. աշխարհը կցնցի խոշորագույն էներգետիկ ճգնաժամը:
Հարցվածների 66%-ը կարծում է, թե երկրի վրա կլինի գլոբալ տաքացում, 42%-ը հավատում է, թե գիտնականները կկարողանան սքանավորել մարդկային ուղեղը եւ կարդալ մտքերը, 89%-ն ակնկալում է, որ մինչեւ 2050թ. ԱՄՆ նախագահ կդառնա կին անձնավորություն, 31%-ը վախենում է, որ մոլորակի վրա աստղակերպ կընկնի:
