![\"\"](\"https://www.aravot.am/2010/aravot_arm/July/2/p14.jpg\")
Ասում է իտալացի ջութակահար Դոմենիկո Նորդիոն, միեւնույն ժամանակ հավելելով, որ արվեստը բոլոր շահերից վեր կանգնելու միակ ձեւն է:
Հայաստանի պետական ֆիլհարմոնիկ նվագախմբի տնօրինության հրավերով Հայաստան է ժամանել իտալացի ճանաչված ջութակահար Դոմենիկո Նորդիոն: Նրա եւ Ֆիլհարմոնիկ նվագախմբի մատուցմամբ (դիրիժոր՝ Էդ. Թոփչյան) այսօր «Արամ Խաչատրյան» համերգասրահում կհնչի համաշխարհային ջութակի գրականության հայտնի ու բարդ երկերից մեկը՝ Սիբելիուսի կոնցերտը:
Ծանոթանալով ջութակահարի ստեղծագործական դիմանկարին՝ տեղեկացանք, որ 16 տարեկանում Դոմենիկոն արժանացել է հեղինակություն վայելող Viotti միջազգային մրցույթի առաջին մրցանակին: Նա իտալացի ջութակահարներից միակն է, ով 1988թ. մասնակցելով դասական «Եվրատեսիլին», շահել է առաջին մրցանակ:
Երաժիշտը նաեւ կամերային երաժշտության նվիրյալներից է, մասնակցել է տարբեր հեղինակավոր փառատոների, իսկ 2003-ից հանդիսանում է միջազգային մրցույթների WFIMC ասոցիացիայի անդամ, 1960թ. հիմնադրված ջութակահարների Citta di Brescia մրցույթի գեղարվեստական ղեկավարը, հանդես է եկել հայտնի համերգային սրահներում՝ ճանաչված սիմֆոնիկ նվագախմբերի ու դիրիժորների հետ: Ինչ վերաբերում է Դոմենիկո Նորդիոյի հյուրախաղային աշխարհագրությանը, «Առավոտի» հետ զրույցում ջութակահարն ասաց, որ չէր եղել միայն Հայաստանում ու Նոր Զելանդիայում: Կեսկատակ-կեսլուրջ էլ հավելեց, որ թերեւս «շփումը» հայերի հետ սկսվել է պատանի հասակից՝ Խաչատրյանի Ջութակի կոնցերտի շնորհիվ: Հույս ունի, որ այս օրերին համագործակցության հիմք կդրվի Էդուարդ Թոփչյանի նախաձեռնությամբ անցկացվող «Երեւանյան միջազգային փառատոնի» եւ Citta di Brescia մրցույթի միջեւ:
Հարցին՝ ի՞նչ է «վերցրել» գրեթե ողջ աշխարհում համերգային շրջագայություն ունեցած երաժիշտը եւ կոնկրետ ի՞նչ է ակնկալում Հայաստանից, մեր զրուցակիցն ասաց. «Նախընտրում եմ մարդկային շփումը եւ չեմ կարծում, որ այն պետք է իրականացնել երաժշտության միջոցով: Երաժշտությունը մեկ ազգի կամ ժողովրդի սեփականությունը չէ, սակայն կրոնական ու քաղաքական շահերից վեր կանգնելու միակ ձեւն է: Ինքս քրիստոնյա եմ, կաթոլիկ, բայց դա չի խանգարել հանդես գալ, օրինակ, Թուրքիայում, Ադրբեջանում…»: Հետաքրքրությանը, թե մուսուլմանական երկրներում ի՞նչ բարձրության վրա է դասական արվեստը, Դ. Նորդիոն ժպտալով նախ ասաց, թե հարկ չկա իրեն կամաց-կամաց «տեղափոխել» քաղաքական դաշտ, հետո էլ ավելացրեց. «Եվ Թուրքիայում, եւ Ադրբեջանում գործող սիմֆոնիկ նվագախմբերը դեռ ճանապարհ ունեն անցնելու: Երաժիշտները երիտասարդ են, սակայն ուրախացնող մի հանգամանք կա՝ այդ երկրների կանայք էլ սկսել են հետաքրքրվել ու մասնագիտանալ դասական արվեստում»:
Թեեւ մեր երկիրը դեռեւս դասական «Եվրատեսիլին» չի մասնակցում, այնուամենայնիվ, հետաքրքրվեցինք՝ ինչպե՞ս է վերաբերվում SMS քվեարկություններին: Դոմենիկոն ասաց, որ քվեարկության այդ ձեւը միայն «Եվրատեսիլի» երգի մրցույթում է, իսկ դասականի դեպքում հաղթողին որոշում է ժյուրին: Համեմատելով նույնիսկ հեղինակավոր մրցույթների հետ, նա առանձնացրեց «Եվրատեսիլի» առավելությունը՝ այն դիտում է շուրջ 80 միլիոն հեռուստադիտող:
