![\"\"](\"https://www.aravot.am/2010/aravot_arm/July/2/p1.jpg\")
ԱՄՆ պետքարտուղար Հիլարի Քլինթոնը հուլիսի 4-ի երեկոյան կժամանի Երեւան: Նախատեսված է, որ նրա այցի շրջանակներում ՀՀ նախագահի եւ ԱԳ նախարարի հետ հանդիպման ընթացքում քննարկման առանցքում են լինելու Լեռնային Ղարաբաղի հակամարտության կարգավորման, հայ-թուրքական հարաբերությունների, նաեւ մարդու իրավունքների, ժողովրդավարացման, մամուլի ազատության հետ կապված հարցերը: Ընդդիմությունը, սակայն, դրան, ըստ ամենայնի, անմասն կմնա: «Առավոտի» աղբյուրների մատուցմամբ, ՀՀ իշխանությունները «դիվանագիտական խողովակներով» հոգ են տարել, որ Քլինթոնը խորհրդարանական եւ արտախորհրդարանական ընդդիմության հետ հանդիպելու շանս չունենա: Նման հանդիպումը հնարավոր կարող է լինել առավելագույնը «քաղաքացիական հասարակության ներկայացուցիչների» հետ հրապարակված, այսպես ասած, «կոլխոզային» հանդիպման շրջանակներում: Երեկվա դրությամբ ո՛չ խորհրդարանական ՀՅԴ ու «Ժառանգություն» կուսակցությունները, ո՛չ արտախորհրդարանական ընդդիմությունը՝ ի դեմս Հայ ազգային կոնգրեսի, Քլինթոնի հետ հանդիպման հրավերներ չէին ստացել:
