![\"\"](\"https://www.aravot.am/2010/aravot_arm/July/1/p18.jpg\")
ՄԱԿ-ի գլխավոր քարտուղար Պան Գի Մունը կոչ է արել Արեւմուտքին՝ շարունակել բանակցություններն Իրանի միջուկային ծրագրի շուրջ: PanARMENIAN.Net-ի մատուցմամբ, նա հայտարարել է, որ նոր պատժամիջոցները Թեհրանի դեմ չեն փակում Իրանի միջուկային խնդրի դիվանագիտական լուծման դուռը: ՄԱԿ-ի գլխավոր քարտուղարը հայտնել է, որ G20-ի շրջանակներում նա քննարկել է Իրանի խնդիրը եվրոպական երկրների առաջնորդների հետ եւ կոչ է արել ՄԱԿ-ի ԱԽ մշտական անդամներին եւ Գերմանիային՝ վերսկսել բանակցությունները Թեհրանի հետ:
Ավելի վաղ Իրանի նախագահ Մահմուդ Ահմադինեջադը հայտարարել է, որ Իրանը մտադիր է մի քանի շաբաթով հետաձգել բանակցություններն Արեւմուտքի հետ: Ըստ Իրանի առաջնորդի, Թեհրանը կվերսկսի բանակցությունները միայն օգոստոսի վերջում: «Այդ պատիժը դաս կլինի, որպեսզի նրանք իմանան, թե ինչպես պետք է երկխոսություն վարել այլ երկրների հետ»,- ասել է Ահմադինեջադը:
Հիշեցնենք, որ 2010թ. հունիսի 9-ին ՄԱԿ-ի Անվտանգության խորհուրդն ընդունել է հերթական բանաձեւը, որը նախատեսում է Թեհրանի հանդեպ պատժամիջոցների խստացում: Սա, ի դեպ, թվով արդեն չորրորդ բանաձեւն է:
