![\"\"](\"https://www.aravot.am/2010/aravot_arm/June/30/p19.jpg\")
«Առավոտի» տեղեկություններով, Մաշտոցի պողոտայում գտնվող երեւանցիների սիրելի «Մալիբու» սրճարանի տարածքը շուտով այլ սեփականատեր կունենա: Լուրեր են շրջանառվում, որ սրճարանի տարածքի նոր տերը հայտնի գործարար Սամվել Կարապետյանն է (Տաշիրի Սամո):
Նշենք, որ սրճարանին հարակից տարածքում է գտնվում Կարեն Դեմիրճյանի ապագա արձանի հուշաքարը: Ուստի հարց է առաջանում, թե տարածքը նորովի շահագործվելու դեպքում Կ. Դեմիրճյանի արձանին տեղ կմնա՞: Այս առնչությամբ Կ. Դեմիրճյանի այրի Ռիմա Դեմիրճյանը «Առավոտի» հետ զրույցում ասաց, որ ինքն արդեն նամակով դիմել է Երեւանի քաղաքապետարան՝ տեղեկանալու՝ իր ամուսնու արձանի տեղադրման վայրը մնո՞ւմ է ուժի մեջ: Քաղաքապետարանից տիկին Ռիմային պատասխանել են, որ արձանի տեղադրման հատվածը որեւէ մեկին չի տրամադրվել, ուստի արձանը տեղադրվելու է այնտեղ, որտեղ նախատեսված էր:
«Առավոտի» հարցին ի պատասխան, Երեւանի քաղաքապետարանից վստահեցրին, որ արձանի տեղադրման վայրը չի փոխվի: Իսկ ինչ վերաբերում է «Մալիբուի» հատվածին, քաղաքապետարանից ասացին, որ տարածքը տնօրինելու համար մրցույթում հաղթող է ճանաչվել «Նոր Երեւան» ՍՊԸ-ն, որը սրճարանի տեղում կկառուցի ստորգետնյա ավտոկայանատեղի, իսկ վերգետնյա հատվածը կծառայի որպես կանաչ տարածք:
