«Պատերազմի վերսկսումը հիմնականում կախված է ուժերի հավասարակշռությունից։ Եթե այդ բալանսը խախտվի հօգուտ որեւէ մեկի, այնքան խախտվի, որ մյուս կողմը գիտակցի, որ պատերազմում կարող է հաջողության հասնել, պատերազմ կսկսվի»,- երեկ ասուլիսին տեսակետ է հայտնել քաղաքագետ Երվանդ Բոզոյանը՝ անդրադառնալով հայ-ադրբեջանական պատերազմի վերսկսման մասին լուրերին։ Ըստ քաղաքագետի. «Եթե պատերազմ չկա, դա Հայաստանի Զինված ուժերի եւ Լեռնային Ղարաբաղի Զինված ուժերի շնորհիվ է։ Դա այն բանի շնորհիվ է, որ Ադրբեջանում տարածված է կարծիք, թե պատերազմի դեպքում իրենք հաջողության չեն հասնի»,- նշեց քաղաքագետը։ Ըստ նրա՝ 90-ականներին էլ Ադրբեջանը մարդկային ռեսուրսներով ու զենք-զինամթերքով մի քանի անգամ գերազանցում էր հայկական կողմին, սակայն տանուլ տվեց։ Դրա պատճառն այն է, որ նման պատերազմներում հաղթանակ տանելը բավականին դժվար է։
«Մեզ համար դա Հայրենական պատերազմի պես բան է, Ադրբեջանի համար՝ ընդամենը տարածքի խնդիր։ Դրանք հոգեբանական տարբեր իրավիճակներ են»,- ասաց Բոզոյանը։ Ըստ քաղաքագետի՝ հնարավոր պատերազմի դեպքում Ադրբեջանի հաղթանակի շանսերը շատ քիչ են, գրեթե չնչին, քանի որ «զենք ու զինամթերքը, մեծ թվով մարդկային ռեսուրսը շատ քիչ են հաղթանակի հասնելու համար»։
