Բնակարանային շինարարության խնդիրները

ՀՀ քաղաքաշինության նախարարի որոշմամբ ստեղծված «Աղետի գոտում անօթեւան մնացած ընտանիքներին պետական աջակցության բնակապահովման ծրագրի իրականացման եւ բնակելի տների հատկացման» հանձնաժողովի անդամ, Լոռու մարզի ներկայացուցիչ Լեւոն Ասլանյանի աշխատասենյակը միշտ լիքն է բնակարանային շինարարության ծրագրում ընդգրկված եւ դուրս մնացած շահառուներով:
2009 թվականից հետաձգվել է 44 գործ. 8 քաղաքացու գործ՝ գրավ դրված հողերի, իսկ մնացածը՝ 1986-90 թվականների տեղեկանքում որդիների առանձին տնտեսություն ունենալու փաստը նշված չլինելու պատճառով: Փաստաթղթերի հետ կապված խնդիրները մեծ տեղ են զբաղեցնում: Հանձնաժողովականների խոսքով, գրանցամատյանում հաճախ հանդիպում ես տարիներ առաջ ամուսնացած աղջկա անուն-ազգանվան, իսկ հարսները որպես կանոն «ամենաարհամարհված» խավն են, նրանց անունները գրանցված չեն եղել երբեք: Միայն անցած տարի տուն ստանալու համար ամուսնությունը գրանցել է 115 ընտանիք, իսկ 17-48 տարեկան 117 չափահաս մարդ նոր անձնագիր է ստացել: Ըստ Լեւոն Ասլանյանի՝ սա նաեւ զինկոմիսարիատի մեղքն է, քանի որ զորակոչիկներին բանակ են տանում առանց անձնագրի: «Ի վերջո, փաստաթղթերի հանդեպ բծախնդրությունն ու ճշգրտությունը կարեւոր են գործընթացը ճիշտ կազմակերպելու համար, սակայն գյուղական համայնքներում ծրագրի հանդեպ անտարբերությունն ու թերահավատությունը ձգձգման պատճառ են դառնում»,- ասում է Լեւոն Ասլանյանը:
2010թ.-ին բնակարանային շինարարության ծրագրում ընդգրկվել է Լոռու մարզի Սպիտակի տարածաշրջանի Շիրակամուտ, Գեղասար, Մեծ Պարնի, Լուսաղբյուր, Սարահարթ, Գոգարան, Արեւաշող գյուղերի անավարտ շինարարություն ունեցող 152 ընտանիք, որից 98-ի պարագայում է, որ խնդիրներ չկան: Սպիտակի տարածաշրջանի 6 այլ համայնքներում՝ Ջրաշեն, Լեռնավան, Կաթնաջուր, Սարամեջ, Ծաղկաբեր, Լեռնանցք, անավարտ շինություն չունեցող ընտանիքների համար կկառուցվի 371 բնակելի տուն: Նույն ծրագիրը կիրականացվի նաեւ Գուգարքի շրջանի Գուգարք, Լեռնապատ, Դարպաս, Եղեգնուտ եւ Ստեփանավանի շրջանի Գյուլագարակ, Գարգառ, Լեջան, Վարդաբլուր գյուղական համայնքներում: Չի բացառվում, որ փաստաթղթային անճշտությունների եւ խնդիրների պատճառով գործընթացից դուրս մնացողներ լինեն:
Այլ խնդիր էլ կա. 22 տարի ժամանակավոր կացարանում բնակված մարդը իր միջոցներով որոշակի աշխատանքներ է արել, մետաղյա կամ փայտե կացարանը քարապատել, հարակից կառույցներ սարքել եւ այդ շինությունը անշարժ գույքի կադաստրի պետական կոմիտեում սեփականություն գրանցել: Ու ստացվում է, որ նա արդեն շինություն-կացարան ունի եւ նույն հողի վրա երկրորդն ունենալ չի կարող: Աղետի գոտում անօթեւան մնացած ընտանիքներ՝ պետական աջակցության բնակապահովման ծրագրի 26 շահառուներ այժմ նույն խնդրի առաջ են կանգնած:
Բացի սրանից, յուրաքանչյուր կամ գրեթե յուրաքանչյուր ընտանիք այսօր արտագնա աշխատանքի գնացած անդամ ունի: Բնակարանային հարցը լուծելու համար ընտանիքի բացակա անդամը պետք է լիազորագիր թողնի: Բայց միշտ չէ, որ քաղաքացիները լսում են այսօրինակ հորդորները:
Ոչ պակաս լուրջ խնդիր է երիտասարդ ընտանիքների հարցը: Երիտասարդները չեն համաձայնում ապրել ծնողների հետ եւ պահանջում-առաջարկում են կառուցել մեկ տուն՝ երկու տարբեր մուտքերով: Իսկ հանձնաժողովն առաջարկում է երիտասարդ ընտանիքներին պաշտոնապես՝ նոտարական հաստատումով հրաժարվել բնակարանի իրենց բաժնից: Հանձնաժողովում 7 այդպիսի գործ կա:
Առայժմ խնդիրներ չկան քաղաքային համայնքներում՝ ավարտին է մոտենում Ստեփանավան եւ Սպիտակ քաղաքների բազմաբնակարան բնակելի շենքերի շինարարությունը, յուրաքանչյուր համայնքում բնակարանի տեր կդառնա 220 ընտանիք: Սպիտակում միակ խնդրահարույց հարցը երկկողմանի ծնողազուրկ ութ երեխաներին բնակարանով ապահովելու խնդիրն է: