Հունիսի 28-ից հուլիսի 3-ը Երեւանի «Միկա» մարզահամալիրում անցկացվելու է բասկետբոլի Եվրոպայի կանանց առաջնության երրորդ դիվիզիոնի մրցաշարը: «A» խմբում, բացի Հայաստանի ազգային հավաքականից, մարզաձեւի սիրահարները ականատես կլինեն նաեւ Մոլդովայի, Անդորրայի, Ջիբրալթարի ընտրանիների մրցելույթին:
Մրցաշարին նախապատրաստվող մեր հավաքականի մարզիչ Գիա Ղազանչյանը «ArmSport.am»-ին տված հարցազրույցում ասել է, որ թիմը պետք է անի ամեն բան՝ հայ մարզասերներին ուրախություն պարգեւելու համար: Գ. Ղազանչյանի խոսքերով, առավելագույն առաջադրանքը հաղթելն է, իսկ նվազագույնը՝ եզրափակիչ մտնելը, ինչը եւս Եվրոպայի առաջնության երկրորդ դիվիզիոն տեղափոխվելու հնարավորություն է ընձեռում:
Հուրախություն բասկետբոլի սիրահարների, Երեւանի «Հատիսի» առանցքային խաղացողներից ամերիկացի Ամանդա Ջեքսոնը Հայաստանի քաղաքացիություն է ստացել եւ հունիսի սկզբներից միացել է մեր հավաքականի մարզումներին: Նրա ներկայությունը, անկասկած, կուժեղացնի մեր ընտրանին:
Նախնական փուլում Հայաստանի հավաքականի խաղերի օրերն են.
Հունիսի 28: Հայաստան-Ջիբրալթար:
Հունիսի 29: Հայաստան-Մոլդովա:
Հունիսի 30: Հայաստան-Անդորրա:
