«Critical Care» ամսագրում հրապարակված նոր հետազոտության հեղինակները պարզել են, թե ինչու է կլինիկական մահվան դեպքում հիվանդն ունենում անդրշիրիմյան զգացողություններ: Պատճառն արյան մեջ ածխաթթու գազի մակարդակի ավելացումն է: Ըստ հետազոտության հեղինակների՝ մինչ օրս գիտությանը հայտնի չէ, թե ինչի հետ են կապված անդրշիրիմյան զգացողությունները: Սակայն այս հետազոտությունն առնվազն օգնում է գտնել ֆիզիկական վիճակի եւ առեղծվածային պատկերների կապի հետքը: CO2 գազի եւ արյան շիճուկում կալիումի բարձր մակարդակները համարվում են այն էական գործոնները, որոնք կլինիկական մահվան ժամանակ առաջացնում են անդրշիրիմյան զգացողություններ:
Հետազոտողներն ուսումնասիրել են միջինը 53 տարեկան 52 հիվանդի՝ 42 տղամարդ եւ 10 կին: Նրանք բոլորը ենթարկվել էին կլինիկական մահվան: drugs.am-ը նշում է, որ առավել արտահայտված անդրշիրիմյան զգացողություններով հիվանդների արյան մեջ բարձր էին ածխաթթու գազի եւ կալիումի մակարդակները:
Սա մեկ քայլ է դեպի առեղծվածային երեւույթների բնույթը պարզելը: Գիտնականները դեռեւս չեն կարողանում գտնել սեռի, տարիքի, կրոնի, մահվան հանդեպ վախի եւ անդրշիրիմյան զգացողությունների միջեւ կապը:
