Գեղարքունիքի մարզպետարանից տեղեկացանք, որ Վարդենիսի տարածքի Մասրիկի հարթավայրի ավելի քան 8000 հեկտար աշնանացան ցորենի ցանքատարածություններից 6000 հեկտարը վարակված է «ժանգ» սնկային հիվանդությամբ: Այս հարթավայրից նորմալ տարիներին մոտ 20 հազար տոննա ցորեն է հավաքվում: «Ժանգը» չորացնում է ցորենի հասկի տերեւները եւ բույսն աստիճանաբար զրկվում է հատիկալցման գործընթացից: Ըստ մասնագետների, հիվանդության պատճառը չընդհատվող տեղումներն են եւ բարձր ջերմաստիճանը: Այս պայմաններում հիվանդության կանխարգելմանը չեն օգնում նաեւ թունաքիմիկատները: Նույն անձրեւների պատճառով այս տարի այս տարածաշրջանում փչանում է նաեւ խոտը:
Մարզպետարանից տեղեկացանք նաեւ, որ իրավիճակին ծանոթանալու նպատակով Գեղարքունիքի մարզպետ Նվեր Պողոսյանը եղել է Մասրիկի հարթավայրում, զրուցել գյուղացիների հետ եւ խոստացել հարցը ներկայացնել ՀՀ կառավարություն:
