Հենվելով «Ամերիկայի ձայն» ռադիոկայանի թուրքական ծառայության տարածած տեղեկության վրա, tert.am-ը տեղեկացնում է, որ Միացյալ Նահանգները որոշել է ֆինանսական աջակցություն ցուցաբերել Հայաստանի հին մայրաքաղաք, «1000 ու մեկ եկեղեցիների քաղաք» Անիի Սուրբ Փրկիչ եկեղեցու վերանորոգման համար՝ տրամադրելով 625 հազար ԱՄՆ դոլար:
2000 թվականին ԱՄՆ Կոնգրեսի հիմնադրած, Միացյալ Նահանգների պետքարտուղարությանը կից գործող Մշակութային արժեքների պահպանության հիմնադրամը հրապարակել է այն պատմամշակութային արժեքների ցանկը, որոնց 2010 թվականին կցուցաբերվի ֆինանսական աջակցություն: Այդ ցանկում տեղ է գտել նաեւ ներկայիս Թուրքիայի տարածքում գտնվող Սուրբ Փրկիչ եկեղեցին:
Անիի Սուրբ Փրկիչ եկեղեցին 1996 թվականից ի վեր ընդգրկված է ՅՈՒՆԵՍԿՕ-ի մշակութային ժառանգության ցուցակում:
