Հունիսի 21-ին Համակարգող խորհրդի ներկայացուցիչներ Սեւակ Արծրունին եւ Ռոբերտ Թաթոյանը ԱՄՆ դեսպանատան քաղաքական-տնտեսական բաժնի ղեկավար Ջուլի Ֆիշերի հետ հանդիպման նկատակով մեկնեցին Թբիլիսի: Սակայն հայ-վրացական սահմանի անցակետում վրացական սահմանապահները, չներկայացնելով որեւէ պատճառաբանություն, թույլ չտվեցին Սեւակ Արծրունուն մտնել Վրաստանի տարածք: ԱՄՆ դեսպանատան աշխատակիցների հետ հանդիպմանը մասնակցեց միայն Ռոբերտ Թաթոյանը, որը ներկայացրեց միջադեպի մանրամասները, ինչպես նաեւ հանձնեց ԱՄՆ կառավարությանը հասցեագրված Համակարգող խորհրդի նամակը՝ ջավախահայության խնդիրների լուծման եւ Վահագն Չախալյանի ազատ արձակմանն ուղղված վրացական իշխանությունների հետ երկխոսության մեջ միջնորդ հանդիսանալու կոչով:
Նշենք, որ հունիսի 21-ի հանդիպմանը հրավիրվել էր Համակարգող խորհրդի անդամ, ՀՀ ԱԺ պատգամավոր Շիրակ Թորոսյանը, սակայն վրացական իշխանությունները նախապես տեղեկացրել էին, որ թույլ չեն տալու նրա մուտքը Վրաստան:
Ջավախահայության իրավունքների պաշտպանության համակարգող խորհուրդը գնահատում է տեղի ունեցածը որպես ԱՄՆ դեսպանատան հետ հանդիպման տապալմանը ուղղված վրացական իշխանությունների նպատակաուղղված փորձ:
