Արմավիրի մարզպետարանից տեղեկացանք, որ մարզպետ Աշոտ Ղահրամանյանը հանդիպել է Իրանի Արեւմտյան Ատրպատական նահանգի Միջազգային ցուցահանդեսների կազմակերպության գործադիր տնօրեն Զ. Բեհեշթին, ով Հայաստանում է Արմավիր մարզի եւ Արեւմտյան Ատրպատականի նահանգի միջեւ 2009 թվականին կնքված համագործակցության պայմանագրի շրջանակներում սեպտեմբերին Հայաստանում՝ Արեւմտյան Ատրպատականում արտադրվող ապրանքների ցուցադրության կազմակերպման հարցերը քննարկելու համար: Այս ցուցահանդեսին կհետեւի Արմավիրի մարզում արտադրվող ապրանքների ցուցադրությունը՝ Արեւմտյան Ատրպատականում:
Թե ինչ կցուցադրեն իրանցիները՝ միայն իրենք գիտեն: Տեղեկացնենք, սակայն, որ մարզպետը օրեր առաջ Արմավիրում ձկնարտադրությամբ զբաղվող կազմակերպությունների ղեկավարներին ցուցադրել է Իրանից բերված ձկան կերի եւ օդամղիչ սարքավորման նմուշներ եւ պատրաստակամություն հայտնել աջակցել դրանք ձեռք բերելու հարցում: Ձկնարտադրողները, սակայն, նշել են, որ ծանոթ են Իրանում արտադրվող կերերին՝ դրանք երբեք աչքի չեն ընկել որակական բարձր հատկանիշներով, հիմնականում խտացված են, ինչը ձկների մոտ մարսողության հետ կապված խնդիրներ է առաջացնում: Իսկ ահա Իրանում ձկնարդյունաբերության մեջ օգտագործվող տեխնիկական սարքավորումները, ըստ հայ ձկնաբույծների, կարելի է կիրառել տեղական ձկնարտադրության մեջ:
Մեր ձկնաբույծները դեմ չեն լինի, եթե պետությունը աջակցի, իրենք գնան Իրան եւ ծանոթանան ձկնարտադրության ոլորտում իրենց հետաքրքրող հարցերին, ձկան կերի արտադրությամբ զբաղվող գործարանների սանիտարահիգիենիկ վիճակին, արտադրական գործընթացին:
