Ռազմավարական եւ ազգային հետազոտությունների հայկական կենտրոնում երեկ քննարկվում էին տարածաշրջանում պաշտպանության բարեփոխումներին եւ ռազմաքաղաքացիական հարաբերություններին վերաբերող հարցեր: ՌԱՀՀԿ տնօրեն Ռիչարդ Կիրակոսյանը կարծիք է հայտնել, որ տարածաշրջանում, մասնավորապես Ադրբեջանում եւ Վրաստանում, սպառազինության մրցավազքի ակնհայտ միտումներ են նկատվում, եւ սա ստիպում է Հայաստանին պատասխանել դրան: Ըստ պարոն Կիրակոսյանի, Հայաստանը միակ երկիրն է, որը տարածաշրջանում խաղաղության եւ կայունության կողմնակից է: Ըստ Ռիչարդ Կիրակոսյանի, Հայաստանի պաշտպանության ոլորտի բարեփոխումները ինստիտուցիոնալ բնույթի են, իսկ Ադրբեջանում՝ կոռուպցիոն: Արեւմտյան փորձագետները նշում են, որ Հայաստանի եւ ԼՂՀ զինվորներն ամենալավն են նախկին խորհրդային երկրների շրջանում, որովհետեւ հայկական բանակում բարոյահոգեբանական վիճակն առողջ է: Ըստ Կիրակոսյանի, Հայաստանը եւ Լեռնային Ղարաբաղը պատրաստվում են 21-րդ դարի պատերազմի, մինչդեռ Ադրբեջանում դեռ 19-րդ դարն է:
