ԱԻՄ ղեկավար Պարույր Հայրիկյանը երեկ՝ Բռնադատվածների օրը, լրագրողների հետ հանդիպման ժամանակ ուրախություն է հայտնել, որ Հայաստանում նշվում է այդ օրը, սակայն դժգոհել է, որ օրվան պատշաճ ուշադրություն չի դարձվում: Նա ԽՍՀՄ կողմից իրականացված բռնապետական ռեժիմը հավասարազոր է համարել ցեղասպանության. «Մենք հաճախ ուրախությամբ ենք հիշում Խորհրդային Միությունը՝ մոռանալով, որ դա բռնապետություն էր, որը 100 միլիոն մարդու կյանք է խլել»: Պատասխանելով լրագրողների հարցերին՝ կապված ՀՀՇ-ի ներսում վերջին զարգացումներին, ասել է, որ ՀՀՇ-ով չի հետաքրքրվում, բայց. «ՀՀՇ-ն նախեւառաջ պետք է խոստովանի իր կատարած սխալները»: Իսկ այդ սխալները, նրա կարծիքով, ոչ թե սովն ու բարոյալքումն էին, այլ ժողովրդավարությանը հակադրվելը: Հայրիկյանի խոսքերով՝ առաջին բացասական ընտրությունների օրինակը տվել է Լեւոն Տեր-Պետրոսյանը, ով միակ նախագահն է, որի ընտրվելու կապակցությամբ կա դատարանի որոշում, որում նշվել է անթույլատրելի ընտրախախտումների մասին:
