«Հղի կանանց խորհուրդ ենք տալիս առողջ ապրելակերպ. չծխել, չխմել, արեւի լոգանք չընդունել, քանի որ քաղցկեղածին նյութերը կարող են ընկերքի միջոցով հասնել պտղին»,- պատասխանելով «Առավոտի» հարցին՝ քաղցկեղը ժառանգակա՞ն է, թե՞ սխալ ապրելակերպի հետեւանք, ասաց Ուռուցքաբանության ազգային կենտրոնի մանկական ուռուցքաբանության բաժանմունքի ղեկավար Գրիգոր Բադալյանը: Ըստ նրա, մեր երկրում տարեկան գրանցվում է մանկական քաղցկեղի 80-100 նոր դեպք: Երեկ Գ. Բադալյանն այդ թեմայով ասուլիս էր հրավիրել: Ըստ բժշկի, չարորակ ուռուցքներից ամենից շատ տարածված է արյան քաղցկեղը՝ լեյկեմիան, ապա լիմֆոմաները՝ ավշային համակարգի ուռուցքները: Պարոն Բադալյանի խոսքերով, երեխաների մոտ մանկական քաղցկեղի դեպքերը նույնպես աճում են, սակայն վիճակն այդքան տագնապալի չէ: Փոխարենը մեր երկիրը սարքավորումների առումով շատ ետ է մնում. «Պետք է ավելի շատ ուշադրություն դարձնել մանկական ուռուցքաբանությանը, զարգացած երկրներից մենք շատ հետ ենք մնում: Որքան վաղ շրջանում հիվանդությունը ախտորոշենք՝ այնքան բուժելը հեշտ ու արդյունավետ կլինի»: Պարոն Բադալյանը պատմեց, թե ինչպես են, օրինակ՝ Անգլիայում կնոջ արգանդի մեջ պտղին քաղցկեղ ախտորոշել, ապա կեսարյան հատումով երեխային հանել են, ուռուցքը վիրահատել եւ պտղին նորից տեղը դրել:
