Առաջին անգամ Հարավարեւելյան եվրոպական հիմնադրամը (EFSE) /https://www.efse.lu/ վարկավորել է Հայաստանի ֆինանսական հատվածը: Ինչպես տեղեկանում ենք «Կոնվերս» բանկի մամուլի հաղորդագրությունից՝ հունիսի 9-ին, Մակեդոնիայի Օհրիդ քաղաքում, EFSE-ի տարեկան ընդհանուր ժողովի ընթացքում, «Կոնվերս բանկ» ՓԲԸ-ն ու EFSE-ին ստորագրեցին պայմանագիր՝ 10 մլն ԱՄՆ դոլարի վարկային ծրագրի մասին: Պայմանագիրը EFSE-ի կողմից ստորագրեց հիմնադրամի տնօրենների խորհրդի անդամ Մարկ Շուբլինը, «Կոնվերս բանկի» կողմից՝ բանկի գործադիր տնօրեն Տիգրան Դավթյանը: Ստացվող վարկը տրամադրվում է 5 տարի ժամկետով եւ նախատեսվում է ուղղորդել փոքր ու միջին գործարարության զարգացմանը:
«Վարկերը տրվելու են առեւտրի, սպասարկումների, արդյունաբերության, գյուղմթերքի արտադրության, վերամշակման եւ այլ ոլորտներում աշխատող փոքր եւ միջին ձեռնարկություններին եւ անհատ ձեռներեցներին»,- նշեց Տիգրան Դավթյանը: «Կոնվերս բանկը» հանրապետության բոլոր մարզերում իրականացնում է փոքր եւ միջին ձեռնարկատիրական գործունեության, այդ թվում գյուղատնտեսության բնագավառի ֆինանսավորում:
