Երեկ Երեւանի քաղաքապետարանը մերժել է ի գիտություն ընդունել «Քաղբանտարկյալների եւ հալածյալների կոմիտեի» համակարգող Կարապետ Ռուբինյանի՝ հունիսի 18-ին, ժամը 20-22-ը, Ազատության հրապարակում զանգվածային նստացույց անցկացնելու մասին իրազեկումը։ «Առավոտի» հետ զրույցում Ռուբինյանը, որը մասնակցել է իրազեկման քննարկմանը, ասաց, թե նստացույցն արգելվել է այն պատճառաբանությամբ, որ հունիսի 13-ից սկսած՝ ամբողջ ամռան ընթացքում Երեւանի քաղաքապետարանը Ազատության հրապարակում այլ՝ մշակութային միջոցառումներ է անցկացնելու: Քաղաքապետարանը, հակառակ օրենքով սահմանված կարգին, Կոմիտեի նախաձեռնած նստացույցն անցկացնելու համար ո՛չ այլ ժամ եւ ո՛չ էլ այլ վայր չի առաջարկել, ավելին՝ քննարկել ու մերժել է Կոմիտեի կողմից արված՝ այլ ակցիան այլ ժամի անցկացնելու առաջարկը: Կ. Ռուբինյանը նկատեց, թե իշխանություններն ամեն ինչի պատրաստ են՝ Ազատության հրապարակում շինարարություն սկսել, այնտեղ ատրակցիոններ տեղադրել, միջոցառումներ անցկացնել, նաեւ այլ քայլերի դիմել՝ միայն թե ընդդիմությունը հրապարակում որեւէ ակցիա անցկացնելու հնարավորություն չունենա:
