Հայ գիտնականների հետազոտությունները բացահայտել են, որ հայ կանանց վրա ազդող ամենաուժեղ աֆրոդիզիակը սպիտակ «Նիվան» է: Այն ոչ միայն սեքսուալ ցանկություն է առաջացնում հայ կանանց մոտ, այլ նաեւ ստիպում է համակրել սպիտակ «Նիվայի» ղեկին գտնվող մարդուն: Բացահայտումը մեծ աղմուկ է բարձրացրել ոչ միայն գիտական աշխարհում, այլ նաեւ երջանիկ սպիտակ «Նիվայի» սեփականատեր հայերի մոտ, ովքեր խոսք են տալիս երբեք չվաճառել հրաշք ավտոմեքենան: Եվ իսկապես, համաձայն հարցումների, սպիտակ «Նիվայով» տղաները ավելի հաճախ են ունենում սեռական կապեր, քան մետալիկ BMW վարողները։ Ցուցանիշները կրկնապատկվում են, եթե սպիտակ «Նիվայի» տերն ապակուն փակցնում է իր անունն ու բջջայինի համարը։
«Փորձերի համար մենք Տանզանիայից բերել էինք իգական սեռի 20 կապիկ, սակայն արդյունքները ճշգրիտ չէին: Մենք դա արագ հասկացանք եւ սկսեցինք փորձեր անել հայաբնակ կապիկների վրա եւ հետազոտությունը առաջ գնաց: Երբ արդեն հասկացանք, որ փորձերը ապահով են, սկսեցինք կանանց ներգրավել: Ապշել էինք արդյունքների վրա: 10-ից 9 հայ կնոջը սպիտակ «Նիվան» աննկարագրելի գրգռում է»,- պատմում է պրոֆեսոր Նիկոլ Սահակյանը: Պետք է նշել, որ յուրահատուկ ազդեցություն ունի կանանց վրա միայն սպիտակ գույնի «Նիվան», ուստի կանաչ, դեղին եւ նույնիսկ կարմիր գույնի «Նիվաների» սեփականատերերը հարվածում են սեփական գլխներին, քանի որ, ՀՀ կառավարության որոշմամբ, արգելվել է ներկել ոչ էրոտիկ գույնի «Նիվաները»:
Ստորեւ բերված աղուսակ Ա-ում կարելի է տեսնել, թե որքան է հայ կնոջը գրգռում սպիտակ «Նիվան»՝ համեմատած այլ ավանդական գրգռիչ համարվող գործոնների հետ: Համեմատության համար հարցվել է 2500 հայ կին եւ աղյուսակում առանձնացվել են, սպիտակ «Նիվայից» զատ, ամենասեքսուալ համարվող գործոնները:
Աղյուսակ Ա
Գրգռիչ գործոն Գրգռման գործակիցը
Սպիտակ «Նիվա» 87
8 նիշանոց հաշիվ բանկում 71
Հարգանք ու պատիվ բակում 69
Տպավորիչ չափսերի սեռական օրգաններ 65
Լավ խորոված սարքելու հմտություն 59
Մազոտ դոշ 42
Շատ հաստ ոսկյա զարդեր 41
Գիտական աստիճան – 6
Աղյուսակ Բ-ն համեմատում է ս պիտակ «Նիվայի» գրգռիչ գործակիցը այլ մակնիշի ավտոմեքենաների հետ:
Աղյուսակ Բ
Ավտոմեքենայի մակնիշը Գրգռման գործակիցը
Սպիտակ «Նիվա» 87
Դեղին «Լամբորջինի» 78
Կարմիր «Ֆերարի» 72
Սեւ «Ռոլս Ռոյս ֆանտոմ» 65
Սպիտակ «Բենթլի» 63
«Կոֆե ս մոլոկոմ 06» – 24
Սպիտակ «Նիվայի» գները Երեւանի ավտոշուկայում մեկ գիշերվա մեջ թանկացան ավելի քան 8 անգամ. եւ այժմ միջին «տյունինգապատ» «Նիվան» արդեն արժե $150 000, սակայն շուկայագետները կանխատեսում են թանկացումներ արդեն մոտ ապագայում: Ռուսական «ՎԱԶ» գործարանն արդեն ստացել է առաջարկներ՝ ամենահայտնի մեքենաշինական կոնցեռններից: Մասնավորապես՝ «Մերսեդես Բենց» կոնցեռնի տնօրինությունը հայտնել է. «Մենք պետք է ադապտացվենք շուկայի փոփոխվող պահանջներին: Եթե «ՎԱԶ»-ը չհամաձայնի վաճառել սպիտակ «Նիվայի» արտադրման իրավունքները, մենք ստիպված կլինենք ստեղծել մեր սեփական սպիտակ, քառակուսի, տհաճ մեքենան, եւ խոսքը BRABUS-ի մասին չէ: Մենք լուրջ ուրիշ ելք չենք տեսնում»: Իսկ հանրահայտ Forbes-ի ամենապահանջված մասնագետների ցուցակը արդեն գլխավորել է Իվան Կիպյատկովը, ով 70-ականներին եղել է «Նիվայի» գլխավոր դիզայները: Նրա խոսքերով, իրեն չափազանց ոգեշնչել էր Մինսկում տեսած թերթերի կրպակը:
