Այն բանից հետո, երբ մայիսի 20-ին, REN-TV հեռուստաընկերության եթերով հեռարձակվել էր ՌԴ Պետդումայում տեղի ունեցող քննարկումներին սակավաթիվ պատգամավորների մասնակցության մասին մի ռեպորտաժ, որում ցուցադրվել էին պատգամավորների կողմից նիստից բացակայող իրենց գործընկերների փոխարեն քվեարկության կոճակը սեղմելու դրվագներ, ռուս պատգամավորները սկսել են ավելի ակտիվ մասնակցել Պետդումայի լիագումար նիստերին եւ քվեարկություններին: Հիմա էլ պատգամավորները դժգոհում են նիստի մասնակիցների անսովոր մեծ քանակությունից: Նրանք հայտարարում են, թե պատգամավորները նիստերի դահլիճում այնքան բարձր են աղմկում, որ աշխատել հնարավոր չէ:
«ՀԼԸ-ծՏՉՏրՑՌ»-ի մատուցմամբ, չորեքշաբթի առավոտյան լիագումար նիստում ՌԴ կոմկուսի խմբակցության պատգամավոր Վիկտոր Իլյուխինը դիմել է նիստը նախագահող Պետդումայի խոսնակ Գրիզլովին՝ խնդրելով լռեցնել դահլիճին, որովհետեւ պատգամավորները ոչ միայն չեն լսում ամբիոնից ելույթ ունեցողներին, այլեւ սեփական հարցերն են քննարկում: Գրիզլովն իր հերթին նիստերի դահլիճում «բարձրացած աղմուկը» համարել է մեծ թվով պատգամավորների ներկայության նշան. «Հարգելի գործընկերներ, այսօր մենք կարող ենք արձանագրել, որ պատգամավորների ներկայության մակարդակը էապես աճել է, ուստի եւ աղմուկի ֆոնն է աճել»:
