Դանիացի ծաղրանկարիչ Կուրտ Վեստերգաարդը հայտարարել է «Jyllands-Posten» թերթից հեռանալու իր որոշման մասին: Այդ մասին փոխանցել է «Ֆրանսպրեսը»՝ վկայակոչելով հենց ծաղրանկարչի հայտարարությունը: Վերջինս ասել է, թե թերթը, որտեղ աշխատել է շուրջ 20 տարի, լքում է, որովհետեւ չի ուզում իր գործընկերներին վտանգի ենթարկել: 75-ամյա նկարիչը նաեւ հայտարարել է, թե ուզում է աշխատանքից հանգստանալ եւ զբաղվել սեփական նկարների ցուցահանդեսի կազմակերպմամբ:
Հիշեցնենք, որ 2005թ.-ին Կուրտ Վեստերգաարդը հիշյալ թերթում հրապարակել է Մուհամմեդ մարգարեի ծաղրանկարը, ինչը մահմեդական աշխարհում բողոքի ալիք էր բարձրացրել: Աշխարհի շատ երկրներում ծաղրանկարչին պատժելու պահանջով բազմահազարանոց ցույցեր էին անցկացվել: Նրա գլխի համար նույնիսկ պարգեւ էր սահմանվել: Ծաղրանկարիչն ու թերթի խմբագրությունը բազմաթիվ անգամ են սպառնալիքներով լի հաղորդագրություններ եւ նամակներ ստացել, նրանց նկատմամբ առնվազն երեք հարձակում է եղել: Դրանից վերջինը տեղի է ունեցել 2010թ. հունվարին, երբ 28-ամյա մի սոմալեցի ներխուժել էր նկարչի տուն եւ սառը զենքով սպառնացել էր նրան սպանել:
