ՄԱԿ-ի մանկական հիմնադրամի, ՄԱԿ-ի փախստականների հարցերով գերագույն հանձնակատարի հայաստանյան գրասենյակի եւ Հայ օգնության միության միջեւ կնքված պայմանագրի համաձայն՝ 2009 թվականի սեպտեմբեր-դեկտեմբեր ժամանակահատվածում Հայաստանում անցկացվել է սոցիոլոգիական հետազոտություն՝ ծննդի պետական գրանցում չստացած երեխաների թվի, հիմնախնդրի պատճառների բացահայտման նպատակով: Արդյունքները ներկայացվեցին երեկ: Ըստ այդմ՝ Երեւանի, Գեղարքունիքի եւ Շիրակի մարզերում ուսումնասիրված 1330 տնային տնտեսությունում հայտնաբերվել է ծննդի պետական գրանցում չստացած 126 երեխա: Մանկական խնամակալական հաստատություններում ծննդի պետական գրանցում չի ունեցել 19 երեխա: Երեխաներից 35-ը ծնվել է տնային պայմաններում:
Ըստ հարցման հեղինակների, հատկապես մարզերում արձանագրվել են դեպքեր, երբ տնային ծնունդներից հետո ծնողները տեղյակ չեն եղել երեխայի ծնունդը գրանցելու անհրաժեշտության եւ ընթացակարգերի մասին: Հետազոտության հեղինակները գտնում են, որ ծնողների իրավագիտակցության մակարդակը բարձրացնելու համար վատ չէր լինի մարզային հեռուստառադիոընկերություններով իրազեկման հաղորդումներ հեռարձակել:
Հարցման արդյունքների ամփոփման ժամանակ մտահոգություն է հնչել, որ չգրանցված երեխաները խոցելի են բռնության, շահագործման, թրաֆիքինգի ենթարկվելու առումով, ուստի երեւույթը պետք է վերացվի:
