«Առավոտը» տեղեկացրել էր, որ 1000 դոլար կաշառք վերցնելու պահին ձերբակալվել է արդարադատության նախարարության «Աբովյան» ՔԿՀ կանանց տեղամասի պետ Կարինե Համբարձումյանը:
Հարուցված քրեական գործի նախաքննության ժամանակ պարզվել էր, որ 7 տարվա ազատազրկման դատապարտված Արեւհատ Սարգսյանը 2 տարի առաջ հոկտեմբերին ՔԿՀ-ից կարճաժամկետ մեկնումի դիմաց (7 օրվա համար) Համբարձումյանին է տվել 1000 դոլար գումար:
Դեկտեմբերին Արեւհատը կրկին ցանկություն է հայտնել կարճաժամկետ շփվել արտաքին աշխարհի հետ, այս անգամ Համբարձումյանը նրանից ստացել է 1500 դոլար գումար:
Համբարձումյանից Արեւհատը խնդրել է, որպեսզի նա բաց տիպի ՔԿՀ ռեժիմ տեղափոխվելու հարցում իրեն օգնի, դրական բնութագիր տա: Բաց տիպի ռեժիմի դեպքում դատապարտյալը դրսում է աշխատում եւ ՔԿՀ է ներկայանում միայն քնելու համար:
2009թ. մայիսին, ըստ նախաքննության տվյալների, Համբարձումյանը պահանջել է 7500 դոլար կաշառք: Նշենք, որ Համբարձումյանն իր խոսքի տերն է եղել. Արեւհատի համար ապահովել էր բաց ռեժիմ դուրս գալը: Արեւհատը լրիվ գումարը չի ունեցել, դրա համար էլ տվել է 3000 դոլար ու այդ պահին էլ բռնվել: Կարինե Համբարձումյանն իրեն մեղավոր չի ճանաչել, եւ ասել է, որ կաշառք չի պահանջել ու չի ստացել: Մեղադրական եզրակացությունը հաստատվել է մայիսի 25-ին եւ գործն ուղարկվել է դատարան:
