Լեհաստանի ավիացիոն հաղորդակցության 36-րդ հատուկ գնդի 29 հոգանոց մի խումբ, որը պատասխանատու է երկրի ղեկավարների թռիչքները կազմակերպելու համար, վայր է դրել իր լիազորությունները: Ինչպես փոխանցում է «Newsru»-ն, վկայակոչելով լեհական հեռուստաընկերությունը, հրաժարական տվողների թվում կան օդաչուներ, նավիգացիոն համակարգերի ծառայողներ եւ բորտմեխանիկներ: Ոչ պաշտոնական տեղեկությունների համաձայն, հրաժարականները կապված են ապրիլի 10-ին Լեհաստանի նախագահի ինքնաթիռի կործանման հետ: Նման որոշման պատճառ կարող էին դառնալ նաեւ զինծառայողների համար սպասվող կենսաթոշակային բարեփոխումները, որոնց արդյունքում գնդում, այսպես թե այնպես, կրճատումներ էին լինելու: Այդուհանդերձ, Լեհաստանի պաշտպանության նախարարությունում վստահեցրել են, որ այդ առնչությամբ տարածված տեղեկությունները չափազանցված են, եւ հույս ունեն զինծառայողներին համոզել՝ հրաժարվելու աշխատանքից ազատվելու մտադրությունից:
Հավելենք միայն, որ 36-րդ հատուկ գունդն իր տրամադրության տակ ունի նաեւ մի քանի ռուսական ինքնաթիռներ, այդ թվում՝ «Տու-154» մեկ ինքնաթիռ: Այդպիսի ինքնաթիռով էր թռչում նաեւ Լեհաստանի նախագահ Լեհ Կաչինսկին: Ավիավթարից հետո լեհական իշխանությունները հայտարարեցին «Տու-154»-ից հրաժարվելու եւ երկրի բարձրագույն իշխանությունների թռիչքները երկու նոր բրազիլական «Embraer-175» ինքնաթիռներով իրականացնելու մասին:
