Գեղարքունիքի մարզի Ճամբարակի տարածքի Վահան գյուղի մանկապարտեզը գործել է մինչեւ 1992 թվականը: Պատերազմի տարիներին մանկապարտեզի շենքը վերածվել է զորանոցի եւ շտաբի, իսկ հրադադարի հաստատումից հետո՝ դադարել գործելուց: Սակայն արդեն մեկ շաբաթ է, ինչ ընթանում են մանկապարտեզի շենքի հիմնանորոգման աշխատանքները:
Ինչպես տեղեկացրեց Վահանի գյուղապետ Գուրգեն Բալյանը` շենքի հիմնանորոգումը իրականացնում են «Շեն» կազմակերպությունը եւ բրիտանական «Կոոպերատիվ հաուզինգ ֆաունդեյշն» ընկերության հայաստանյան մասնաճյուղը: Մանկապարտեզի հիմնանորոգման համար տրամադրվել է մոտ 55 միլիոն դրամ: 2 միլիոն 900 հազար դրամ կազմելու է Վահանի գյուղապետարանի ներդրումը:
Հիմնանորոգման աշխատանքներում ներգրավված են վահանցի 7 բանվորներ: Կառուցվելու է ջեռուցման համակարգ, սանհանգույց, ճաշարան, երկու ննջասենյակ, երկու խաղասենյակ, լվացքատուն, բուժսենյակ: Նախատեսված է շինարարական աշխատանքներն ավարտել 133 աշխատանքային օրում՝ մինչեւ այս տարվա սեպտեմբերի վերջ: Հիմնանորոգումից հետո մանկապարտեզը կարող է ընդունել մինչեւ 80 երեխա: Այսօրվա դրությամբ հերթագրված է 40-ը:
