ՀՀ մարդու իրավունքների պաշտպան Արմեն Հարությունյանը դիմել է ՀՀ ոստիկանապետ Ալիկ Սարգսյանին, հայտնելով, որ մայիսի 31-ին, ժամը 18-ի սահմաններում իր գրասենյակի աշխատակիցները հանձնարարությամբ այցելել են Երեւանի Մաշտոցի պողոտա (Սարյանի արձանին հարող տարածք), որտեղ մի խումբ քաղաքացիներ մասնակցել են բողոքի ակցիային:
Ըստ պաշտպանի՝ ֆոտոթղթակից Գ. Շամշյանը իր ներկայացուցիչներին հայտնել է, որ «բողոքի ակցիայի ընթացքում 2 երիտասարդ, որոնք լրագրողներին ներկայացել էին իբրեւ ՀՀ մարդու իրավունքների պաշտպանի աշխատակազմի աշխատակիցներ, սպառնացել են իրենց եւ տվել սեռական բնույթի հայհոյանքներ, ինչպես նաեւ փորձել են իրենից խլել նրան պատկանող տեսախցիկը: Գ. Շամշյանը միաժամանակ հայտնել է, որ որպես կատարվածի ապացույց, թե իր, թե ակցիային ներկա գտնվողներից ոմանց մոտ առկա են ֆոտո եւ տեսանկարահանման ժապավեններ»: Պաշտպանը ոստիկանապետին խնդրում է փաստի առթիվ նախապատրաստել նյութեր եւ տալ իրավական ընթացք:
