Վանաձորի Հովհ. Աբելյանի անվան պետական դրամատիկական թատրոնում պարբերաբար ներկայացվում են ԵԹԿՊԻ-ի Վանաձորի մասնաճյուղի ռեժիսուրայի բաժնի շրջանավարտների դիպլոմային աշխատանքները: Օրերս ԵԹԿՊԻ-ի Վանաձորի մասնաճյուղի ռեժիսուրայի բաժնի 4-րդ կուրսի ուսանող Տիգրան Սուքիասյանի բեմադրությամբ հանդիսատեսը դիտեց Ժան Պոլ Սարտրի «Հարգարժան Լիզին» պիեսի վանաձորյան պրեմիերան: Ներկայացումը կամերային էր, եւ հանդիսատեսն ու դերակատարները գտնվում էին նույն հարթության վրա: Ներկայացման մեջ քննարկվող թեմաները՝ խաբեություն, բռնություն, հիվանդ ճշմարտություն, այսօր էլ արդիական են եւ մտահոգիչ: Սարտրի ապրած շրջանում սպիտակամորթները ընդգծված առավելություն ունեին սեւամորթների նկատմամբ: Պիեսում ցույց է տրվում, թե ինչպես անմեղ սեւամորթը կախաղան է բարձրացվում մեղավոր սպիտակամորթի փոխարեն: Հանցագործը, որը իշխանի որդի էր, մտերմիկ կապ է հաստատում ցուցմունք տվող անառակ կնոջ հետ եւ օգտագործելով հոր բարձր դիրքը հօգուտ իրեն՝ ցուցմունք կորզում նրանից:
«Ես, որպես երիտասարդ դերասանուհի, կարծում եմ, որ այսպիսի ներկայացումները անհրաժեշտ են մեր հանդիսատեսին…»,- ասաց Լիզիի դերակատար Ալլա Դարբինյանը, հավելելով, որ ներկայացումը դրական ընդունելություն է գտել թատրոնի գեղխորհրդի եւ հանդիսատեսի կողմից:
