Մայիսի 24-ին Տավուշի մարզի Ոսկեպար գյուղում կայծակը հարվածել է Վերան Գեւորգյանի տնամերձ հողամասում գտնվող էլեկտրական հենասյանը: Դրանից մեկ օր առաջ էլ կայծակը հարվածել է գյուղի տարածքում: Ընդ որում՝ կայծակի հարվածները մարդկանց համար անսպասելի են եղել, այդ պահերին անձրեւ կամ ամպրոպ չի եղել: Ոսկեպարի բնակիչներն ասացին, որ կայծակի հարվածից գյուղի տներում բազմաթիվ հեռուստացույցներ եւ հեռախոսներ են փչացել; Ոսկեպարի գյուղապետ Հրուշ Աղբալյանն ասաց, որ այս կապակցությամբ ոչ ոք գյուղապետարան չի դիմել:
Ոսկեպարում մի քանի օր առաջ սատկել են Մարտիկ Գեւորգյանի 6 խոճկորները: Գյուղապետի խոսքերով՝ սատկած կենդանիներից վերցված փորձանմուշը լաբորատոր ուսումնասիրության համար ուղարկվել է Երեւան: Դրանց արդյունքում կորոշվի՝ խոճկորները աֆրիկյան ժանտախտի՞ց են սատկել, թե՝ ոչ:
Հիշեցնենք, որ Տավուշի մարզում տարածված աֆրիկյան ժանտախտ հիվանդությունից արդեն մի քանի հարյուր խոզ ու խոճկոր է սատկել կամ հարկադրաբար ոչնչացվել: Վարակը տարածվել է նաեւ Տավուշին հարեւան Լոռիում եւ Գեղարքունիքում: Աֆրիկյան ժանտախտի բռնկման եւ տարածման մասին «Առավոտը» գրում է այս տարվա մարտից: Վերջին անգամ՝ մայիսի 25-ին՝ «Ժանտախտ եւ բրուցելոզ՝ Գեղարքունիքում»:
