Իրանի իշխանությունները $200 հազար գրավի դիմաց ազատ են արձակել կինեմատոգրաֆիայի ոլորտում միջազգային բազմաթիվ հեղինակավոր փառատոների մրցանակակիր, հայտնի ռեժիսոր Ջաֆար Պանահիին: Ավելի քան երկու ամիս կալանքի տակ գտնվող կինոռեժիսորը հացադուլ էր հայտարարել՝ պահանջելով թույլատրել հանդիպել հարազատների եւ իր փաստաբանի հետ: Նա կալանավորվել էր, ըստ էության, իրանական ընդդիմությանը համակրելու մեղադրանքով:
Պանահին աշխարհում հայտնի էր դարձել իր «Օղակ», «Օֆսայդ», «Բոսորագույն ոսկի» ֆիլմերի շնորհիվ: Նրա առաջին լիամետրաժ ֆիլմը՝ «Սպիտակ օդապարիկ», 1995թ.-ին արժանացել է Կաննի կինոփառատոնի երեք մրցանակների, այդ թվում՝ «Ոսկե տեսախցիկին»: 1997թ.-ին Ֆրանսիայի մշակույթի նախարարությունը կինոռեժիսորին արժանացրել էր «Արվեստների ասպետի» կոչմանը:
