Երեկ տեղեկացրել էինք, որ առավոտյան Երեւան-Գյումրի ավտոճանապարհին, Մաստարա գյուղի մոտ, դեռեւս չպարզված հանգամանքներում, բախվել էին «ՎԱԶ-2106» մակնիշի 64 ՏՏ 119 եւ «ԳԱԶ-3110» մակնիշի 55 ՕԼ 100 պետհամարանիշների ավտոմեքենաները:
ԱԻՆ փրկարար ծառայությունը երեկ տեղեկացրեց, որ պարզվել են զոհերի եւ տուժածների ինքնությունները:
Պատահարի հետեւանքով «ԳԱԶ-3110» ավտոմեքենայի ուղեւոր, Գյումրիի 51-ամյա բնակչուհի Վեներա Սահակյանը եւ «ՎԱԶ-2106» ավտոմեքենայի ուղեւոր Արթուր Ղազարյանը տեղում մահացել են, իսկ «ԳԱԶ-3110» ավտոմեքենայի վարորդ, Գյումրիի 56-ամյա բնակիչ Վահան Սահակյանը, ուղեւորներ՝ 32-ամյա Մարիամ եւ 25-ամյա Տաթեւ Սահակյանները մարմնական վնասվածքներով տեղափոխվել են Աշտարակի հիվանդանոց:
«ՎԱԶ-2106» ավտոմեքենայի ուղեւորներ, Երեւանի բնակիչներ՝ 20-ամյա Նարեկ Թադեւոսյանը, 34-ամյա Ջանիկ Թորոսյանը, 22-ամյա Գեւորգ Օհանջանյանը եւ 21-ամյա Արծվիկ Աբրահամյանը մարմնական վնասվածքներով տեղափոխվել են Գյումրիի Գյուլբենկյանի անվան հիվանդանոց:
Ըստ բժիշկների՝ տուժածների վիճակը բնութագրվում է միջին ծանրության:
