ԳԼՈՐՎԵԼ ԷՐ ՑԱԾ
Մայիսի 22-ին Սյունիքի մարզի Փայտահանի գյուղապետից ահազանգ է ստացվել, որ նույն գյուղի բնակիչ՝ 20-ամյա Տիգրան Ավանեսյանը տնից դուրս է եկել եւ չի վերադարձել: Որոնողական աշխատանքների շնորհիվ Տ. Ավանեսյանին փրկարարները հայտնաբերել են գյուղից 800 մ հեռավորության վրա. վերջինս 15-20 մ բարձրությունից գլորվել էր թփուտի մեջ եւ գտնվում էր անգիտակից վիճակում: Տուժածին տեղափոխել են Գորիսի հիվանդանոց: Ըստ բժշկի՝ Տ. Ավանեսյանն ստացել է գլխուղեղային վնասվածք եւ բազմաթիվ քերծվածքներ. առողջական վիճակը գնահատվում է ծանր:
«ՄԵՐՍԵԴԵՍԸ»՝ ՁՈՐԱԿՈՒՄ
Մայիսի 23-ին Երեւանի ճանապարհային ոստիկանությունից ահազանգ է ստացվել, որ Երեւանյան լճին հարակից տարածքում «Մերսեդես-Ս600» մակնիշի 10 ԼՏ 005 պետհամարանիշի ավտոմեքենան դուրս է եկել ճանապարհի երթեւեկելի մասից, հարվածել մայթեզրի պատնեշին եւ շրջվել ձորակը: Մինչ փրկարարների՝ կանչի վայր հասնելը, ավտոմեքենայից դուրս են բերվել եւ Երեւանի «Էրեբունի» բժշկական կենտրոն տեղափոխվել 23-ամյա Արթուր Ավագյանը եւ 24-ամյա Բագրատ Սարգսյանը: Փրկարարների ուժերով ավտոմեքենան դուրս է բերվել երթեւեկելի հատված:
ԵՐԵԽԱՆ ԳԵՏԻՑ ԴՈՒՐՍ Է ԲԵՐՎԵԼ
Հրազդան քաղաքի Ջրառատ թաղամասում՝ Մարմարիկ գետի վրա կառուցված կամրջի տակ, Հրազդանի հրշեջ փրկարարական ջոկատի փրկարարները՝ ստանալով ահազանգ, տեղի բնակիչների հետ համատեղ գետից անվնաս դուրս են բերել 210/43 հասցեի բնակիչ՝ 13-ամյա Հարություն Հակոբյանին: Պատանին տեղափոխվել է տուն:
ԵՐԵԿՎԱ ԶՈՀԵՐԸ
Երեկ, ժամը 07.10-ին, Շիրակի մարզից տեղեկություն է ստացվել, որ Երեւան-Գյումրի ճանապարհին՝ Մաստարա գյուղին հարակից հատվածում, տեղի է ունեցել ճանապարհատրանսպորտային պատահար: Դեռեւս չպարզված հանգամանքներում բախվել են «ՎԱԶ-2106» մակնիշի 64 ՏՏ 119 եւ «ԳԱԶ-3110» մակնիշի 55 ՕԼ 100 պետհամարանիշների ավտոմեքենաները, ինչի հետեւանքով 2 մարդ զոհվել է, 6-ը՝ վիրավորվել: Տուժածները տեղափոխվել են Մարալիկ քաղաքի հիվանդանոց:
ՀԱՅՏՆԱԲԵՐՎԵԼ Է
Երեւանի Րաֆֆու 95/13 հասցեի հետ կապված ստանալով ահազանգ, փրկարարները բացել են նշված բնակարանի դուռը, որտեղ հայտնաբերվել է 81-ամյա Հովհաննես Քառյանի դիակը:
