![\"\"](\"https://www.aravot.am/2010/aravot_arm/May/21/p17.jpg\")
Նախօրեին Թուրքիայի վարչապետ Ռեջեփ Թայիբ Էրդողանը հեռախոսազրույց է ունեցել Ռուսաստանի Դաշնության վարչապետ Վլադիմիր Պուտինի եւ Միացյալ Նահանգների նախագահ Բարաք Օբամայի հետ: Tert.am-ը, վկայակոչելով «HaberTurk»-ը, փոխանցում է, որ հեռախոսազրույցները տեղի են ունեցել թուրքական կողմի նախաձեռնությամբ: Հեռախոսազրույցների ընթացքում կողմերը քննարկել են իրանական միջուկային խնդիրը, Իրանի դեմ հնարավոր պատժամիջոցները եւ օրեր առաջ Թեհրանի, Անկարայի ու Բրազիլիայի միջեւ ստորագրված միջուկային վառելիքի փոխանակման մասին պայմանագիրը: «Իրանի հետ ստորագրված համատեղ համաձայնագիրը երկխոսության եւ դիվանագիտության հաղթանակ է: Ընձեռված այս հնարավորությունից կարելի է օգուտ քաղել: Խնդիրը պետք է լուծել երկխոսության ճանապարհով»,- Պուտինի հետ հարցազրույցում հայտարարել է Էրդողանը: Բարաք Օբաման ընդգծել է, որ Իրանը պետք է կատարի միջազգային պարտավորությունները, հակառակ դեպքում՝ Թեհրանի դեմ նոր պատժամիջոցներն անխուսափելի են լինելու:
Հիշեցնենք, որ մայիսի 19-ին Իրանի դեմ պատժամիջոցների վերաբերյալ նոր նախագիծը ամերիկյան պատվիրակությունը ներկայացրել էր ՄԱԿ-ի Անվտանգության խորհուրդ:
