![\"\"](\"https://www.aravot.am/2010/aravot_arm/May/21/p14.jpg\")
«Առավոտի» տեղեկություններով, սփյուռքահայ ճանաչված բարերար եւ գործարար Վահագն Հովնանյանը պատրաստվում է Վահագնի թաղամասում ամերիկյան տիպի դպրոց հիմնել, որը կգործի նոր ուսումնական տարում: Պարոն Հովնանյանը հեռախոսով հաստատեց մեր ունեցած լուրը, հավելելով, որ բացման ճիշտ օրը դեռ հստակ չէ: «Առաջ Աստված»,- ասաց նա ու խոստացավ դպրոցի հետ կապված մանրամասներին ծանոթացնել կրթօջախի տնօրենի միջոցով: Չնայած դեռ համապատասխան փոփոխություն չի եղել օրենքում, սակայն օտարալեզու դպրոց բացելու ցանկությունները չեն նվազում, դրա համար էլ ՀՀ ԿԳ նախարարության հասարակայնության հետ կապերի վարչության պետ Արթուր Բաղդասարյանին հարցրինք՝ արդեն Վ. Հովնանյանին տրվե՞լ է օտարալեզու դպրոց բացելու իրավունք: «Օրենքում փոփոխությունը դեռ չի կատարվել, իսկ եթե Վահագն Հովնանյանը նման ցանկություն ունի՝ իրենից էլ ճշտեք: Երբ օրենքում համապատասխան փոփոխություն կլինի, Վահագն Հովնանյանի առաջարկը ԿԳ նախարարությունը կքննարկի եւ կառավարությանը իմաց կտա: Կարծում եմ, նման ցանկություն հայտնելը նորմալ է, եթե ԱԺ-ն կառավարության նախաձեռնությունը հաստատի, նման ցանկություն հայտնելը նորմալ է»:
