![\"\"](\"https://www.aravot.am/2010/aravot_arm/May/20/p8.jpg\")
Չորեքշաբթի օրը Ղրղըզստանի Ջալալ-Աբադի մարզային հիվանդանոց է տեղափոխվել 16 մարդ, Սուզակսկի տարածքային հիվանդանոց՝ մեկ սպանված: BBC-ի մատուցմամբ, այդ մասին հայտարարել է երկրի առողջապահության նախարարության մամուլի քարտուղարը: Երեկ Ջալալ-Աբադում շարունակվել են երկրի ժամանակավոր կառավարության ընդդիմախոսների եւ հատուկջոկատայինների միջեւ բախումները:
«Կրակում են՝ ինչպես ցուցարարները, այնպես էլ՝ հատուկջոկատայինները: Կան վիրավորներ եւ մեկ սպանված, բայց ցուցարարները չեն հանձնվում: Նրանց օգնական նոր ուժեր են միանում»,- հայտարարել է Ջալալ-Աբադի օպերատիվ արձագանքման քաղաքացիական կենտրոնի ներկայացուցիչ Բակտիկան Ժապարովան:
«Ազատություն» ռ/կ-ի մատուցմամբ, բախումները տեղի են ունեցել, երբ մոտ 5 հազար մարդ գրոհել է Ուզբեկստանի կողմից ֆինանսավորվող համալսարանի շենքը՝ քարկոծելով եւ ջարդուփշուր անելով լուսամուտների ապակիները: Ոստիկանությունը օդ է կրակել՝ փորձելով ցրել ամբոխը: Երեկ, ավելի վաղ, ցուցարարները երթ են անցկացրել քաղաքում՝ պահանջելով ուզբեկ փոքրամասնության առաջնորդ Կադիրժան Բադիրովի ձերբակալությունը, որին մեղադրում են սադրանքների եւ ազգամիջյան լարվածություն ստեղծելու մեջ: Բադիրովը սատարում է երկրի ժամանակավոր կառավարությանը:
