Երեկ Էրեբունի եւ Նուբարաշեն վարչական շրջանների ընդհանուր իրավասության դատարանում, Արտուշ Գաբրիելյանի նախագահությամբ, շարունակվեց Նուբարաշենի թիվ 11 հատուկ դպրոցի ուսուցիչ Լեւոն Ավագյանի նկատմամբ հարուցված քրեական գործով դատական վիճաբանությունների փուլը: Հիշեցնենք, որ ուսուցչի համար, որը մեղադրվում է անչափահաս սանուհիների նկատմամբ 1985-2008 թթ. ժամանակահատվածում անառակաբարո գործողություններ կատարելու համար, մեղադրող Կարեն Բադիկյանը պահանջել էր 1,5 տարվա ազատազրկում:
Մինչ դատարան մտնելը՝ հասարակական իրավապաշտպան կազմակերպությունների ներկայացուցիչները ցուցապաստառներով փակել էին մուտքը: Նրանք մանկապիղծ ուսուցչի համար պահանջում էին անգամ ցմահ ազատազրկում: Լեւոն Ավագյանի փաստաբանը իր պաշտպանական ճառում մեջբերումներ արեց Աստվածաշնչից, ասելով՝ թող քար նետի նա, ով անմեղ է:
Դատավճիռը կհրապարակվի մայիսի 24-ին:
