Արգենտինայի «Նյուելս Օլդ Բոյզ» ֆուտբոլային ակումբի ուրուգվայահայ հարձակվող Խոակին Բոգոսյանը չի հրավիրվել ՀԱՀ-ում կայանալիք աշխարհի առաջնության եզրափակչում հանդես գալուն նախապատրաստվող Ուրուգվայի ազգային հավաքական: Ընտրանու մարզչական շտաբը, Օսկար Տաբարեսի գլխավորությամբ, օրերս հրապարակել է ազգային հավաքականի նախնական կազմը: 26 ֆուտբոլիստների ցուցակում Բոգոսյանի ազգանունը բացակայում է:
Դա նշանակում է, որ Արգենտինայի ազգային առաջնության լավագույն հարձակվողներից մեկին ձեռք բերելու՝ ֆուտբոլի Հայաստանի ազգային հավաքականի հնարավորությունները մեծանում են: Ըստ «Ռեգնում» լրատվական գործակալության տարածած տեղեկատվության, ինքը՝ ֆուտբոլիստը, անցած շաբաթ արդեն ակնարկել է, որ, ամենայն հավանականությամբ, կարող է հագնել հենց Հայաստանի ազգային հավաքականի համազգեստը: «Ինձ Հայաստանի հավաքականում հանդես գալու գաղափարը դուր է գալիս: Ամռանը այդ հարցն ընտանիքիս եւ գործակալիս հետ քննարկելուց հետո ես վերջնական որոշում կկայացնեմ»,- Խոակին Բոգոսյանին մեջբերում է արգենտինական «La Capital»-ը:
