«Մարդկանց անխնա վերաբերմունքի պատճառով այսօր Հայաստանում 5-6 ընձառյուծ է մնացել, որոնց պահպանությունը խիստ կարեւոր է մեր հանրապետության համար»,- մեզ հետ զրույցում ասաց փորձագետ Լիլիկ Սիմոնյանը:
«ՅՈՒՆԵՍԿՕ»-ի միջազգային հիմնադրամը 2010 թ. հայտարարել է Կենսաբազմազանության պահպանման տարի: Հայաստանում այս առումով կովկասյան ընձառյուծի պահպանությունը առաջնային խնդիր է: Ուստի հաշվի առնելով այս կենդանու թվաքանակի նվազումը, Նորվեգիայի կառավարության ֆինանսական աջակցությամբ եւ Բնության համաշխարհային հիմնադրամի հայաստանյան մասնաճյուղի կողմից այս տարին հայտարարվել է Հարավային Հայաստանում կովկասյան ընձառյուծի պահպանման տարի:
1987 թվականից սկսած, ընձառյուծը գրանցված է Հայաստանի կենդանիների Կարմիր գրքում՝ որպես անհետացող տեսակ: Այդ ծրագրի շրջանակներում «Հայ կանայք հանուն առողջության եւ առողջ շրջակա միջավայրի» հ/կ-ն մայիսին Կենդանաբանական այգում անցկացնելու է միջոցառում՝ նվիրված կովկասյան ընձառյուծի պահպանմանը: «Շուրջ մեկ ամիս մենք տարբեր դպրոցներում սեմինարներ ենք անցկացրել՝ նվիրված ընդհանրապես շրջակա միջավայրի պահպանմանը եւ արտաքին միջավայրից պաշտպանվելու միջոցներին: Մենք հիացած էինք, որ հայ երեխաները, բացի համակարգչից եւ բջջային հեռախոսից, այդքան մեծ հետաքրքրությամբ կարող են մասնակցել դասընթացներին: Ամսվա ընթացքում երեխաները պատրաստել են ընձառյուծի դիմակներ, բանաստեղծություններ, թվով 139 աշխատանք, որոնցից ժյուրին կընտրի լավագույնները»,- նշեց կազմակերպության նախագահը: Միջոցառման ընթացքում երեխաները ցուցադրելու են իրենց ձեռքի աշխատանքները, նաեւ՝ իրենց կողմից պատրաստված հագուստներով թատերական ներկայացում: «Այս նախաձեռնությունը մտնում է «Կարմիր գրքի էջերի կանաչացում» ծրագրի մեջ: Ակցիայի նպատակը երեխաների միջոցով տեղեկացնելն է ընձառյուծներին սպառնացող վտանգի մասին, նաեւ երեխաների մեջ կենդանիների հանդեպ խնամքի եւ հոգածության զգացմունքի դաստիարակումը»,- նշեց հ/կ անդամ Քնարիկ Գրիգորյանը:
