Երեկ Հայաստանի գրողների միությունը վերջապես որոշել է խախտել լռության ուխտն ու խոսել հատկապես վերջին օրերին հասարակական եւ քաղաքական լայն շրջանակների կողմից քննարկվող եւ վիճահարույց «Լեզվի մասին» եւ «Հանրակրթության մասին» ՀՀ օրենքներում փոփոխություններ եւ լրացումներ կատարելու մասին» օրինագծերի մասին: Քննարկելով դրանք՝ ՀԳՄ նախագահությունը կտրականապես դեմ է արտահայտվել ներկայացված նախագծին՝ այն համարելով ոչ միայն ՀՀ Սահմանադրության 12-րդ հոդվածին հակասող, այլեւ անհեռատես ու ոչ ընդունելի՝ ազգային-պետական շահերի հայեցակետից, եւ առաջարկել է ՀՀ ԱԺ-ին՝ փաստաթուղթը քննարկման չդնել: ՀԳՄ-ի համոզմամբ, «անխաթար պահպանելով կրթական ազգային համակարգը՝ միանգամայն հնարավոր է էապես բարելավել օտար լեզուների ուսուցումը մեր դպրոցներում»՝ ժամանակի պահանջներին համահունչ սերունդ դաստիարակելու համար:
