ԱՄՆ դեսպանատնից ուղարկված հաղորդագրությունից տեղեկանում ենք, որ երեկ ԱՄՆ փոխդեսպան Ջոզեֆ Փենինգտոնը, ԱՄՆ պետական դեպարտամենտի մարդասիրական օգնության գրասենյակի տնօրեն Ջերրի Օբերնդորֆերը, ՀՀ կառավարման մարմինների ներկայացուցիչները, միջազգային հասարակական կազմակերպությունները եւ այլ հյուրեր մասնակցեցին Արարատի մարզի Դարբնիկ գյուղի դպրոցում ջեռուցման համակարգի եւ սանհանգույցների կառուցման ծրագրի բացմանը: 1966թ. կառուցված այս դպրոցում չեն եղել ոչ ջուր, ոչ ջեռուցում եւ ոչ էլ սանհանգույցներ։ Ծրագիրն իրականացվել է «Միջազգային օգնություն եւ զարգացում» կազմակերպության կողմից՝ ԱՄՆ պետդեպարտամենտի տրամադրած 19 հազար դոլար ֆինանսավորման շնորհիվ։ Իրենց աջակցությունն են բերել «Վերջին օրերի սրբերի բարեգործություններ» կազմակերպությունը (մորմոնները) ($4000) եւ Քերոլայն ու Ջորջ Նաջարյանները՝ ԱՄՆ-ից ($4000)։
Փորձեցինք ճշտել Մայր աթոռի վերաբերմունքը՝ արդյո՞ք մտահոգ չեն, որ մորմոններն են դպրոցում բարեգործություն իրականացնում: Տեղեկատվական համակարգից հայր Հակոբը խոստացավ ավելի ուշ պատասխանել, իսկ Քրիստոնեական դաստիարակության կենտրոնի տնօրեն հայր Վարդանը՝ տեղեկատվությունը այլ աղբյուրներից ճշտելուց հետո:
