Ռուսաստանի Դաշնության արտաքին գործերի նախարար Սերգեյ Լավրովը մայիսի 13-ին խորհրդարանի վերին պալատում՝ Դաշնության խորհրդում, ասել է, որ Ռուսաստանը եւ Ադրբեջանը մինչեւ այս տարեվերջ կստորագրեն երկու երկրների պետական սահմանը հստակեցնող պայմանագիրը։
«Տառացիորեն վերջերս Ադրբեջանի հետ համաձայնություն է ձեռք բերվել սահմանագծման վերջին հատվածի վերաբերյալ։ Համապատասխան պայմանագիրը կստորագրվի մինչեւ 2010 թվականի վերջը»,- փոխանցում է «Ազատություն» ռ/կ-ն:
Նախարարի խոսքերով, ավարտին է մոտենում նաեւ Աբխազիայի եւ Հարավային Օսեթիայի հետ սահմանագծման աշխատանքը։ Վերջին տարիներին Ռուսաստանը սահմանների ձեւավորման պայմանագրեր է կնքել հարեւան մի շարք պետությունների՝ Նորվեգիայի, Ֆինլանդիայի, Լեհաստանի, Չինաստանի, Մոնղոլիայի եւ Հյուսիսային Կորեայի հետ։ «Սակայն այնպիսի հարեւանների հետ, ինչպիսիք են Վրաստանը, Էստոնիան եւ Ճապոնիան, բանակցային գործընթացներն ունեն որոշակի առանձնահատկություններ»,- ասել է Սերգեյ Լավրովը՝ միաժամանակ նշելով, որ այդ երկրների հետ աշխատանքը շարունակվում է։
