Մայիսի 14-ին Հայաստանի ԳԱԱ-ում կնշվի մեծավաստակ պատմաբան, հասարակական-քաղաքական գործիչ, ՀՀ ԳԱԱ ակադեմիկոս Գեւորգ Ղարիբջանյանի 90-ամյակը: Ըստ ՀՀ ԳԱԱ Տեղեկատվական-վերլուծական կենտրոնի, հանդիսավոր միջոցառմանը կմասնակցեն ՀՀ ԳԱԱ ղեկավարությունը, ՀՀ Ազգային ժողովի աշխատակազմի ղեկավար Գեղամ Ղարիբջանյանը, ՀՀ պաշտպանության նախարարության Ռազմավարական հետազոտությունների ինստիտուտի պետ, գեներալ Հայկ Քոթանջյանը, ՀՀ ԱԺ պատգամավորներ, մտավորականության, հասարակական-քաղաքական շրջանակների ներկայացուցիչներ: ՀՀ ԳԱԱ ակադեմիկոս, ՀՀ գիտության վաստակավոր գործիչ, պատմական գիտությունների դոկտոր, պրոֆեսոր Գ. Ղարիբջանյանը պարգեւատրվել է 30 շքանշաններով ու մեդալներով: Նա «Զորավար Անդրանիկ» հայոց համազգային միության պատվավոր նախագահն էր, ԽՍՀՄ եւ ՀՀ գրողների եւ ժուռնալիստների միության անդամ, ՀԽՍՀ 8-րդ եւ 9-րդ գումարումների Գերագույն խորհուրդների պատգամավոր, ՄԱԿ-ի միջազգային տեղեկատվական ակադեմիայի իսկական անդամ, Ստեփան Շահումյանի անվան մրցանակի թիվ մեկ դափնեկիր:
