Մ. Սարյանի տուն-թանգարանում գործում է «Մարտիրոս Սարյանը Հայրենական մեծ պատերազմի տարիներին» խորագրով ցուցահանդես՝ նվիրված Մեծ հայրենականի հաղթանակի 65-ամյակին։ Ներկայացված են նկարչի 1941-1945թթ. 13 գեղանկարչական եւ 31 գրաֆիկական աշխատանքներ, որոնք համալրված են Մարտիրոս Սարյանի տուն-թանգարանի եւ նկարչի ընտանիքի հավաքածուներից։ Պատերազմական իրականության արձագանքները հատկապես արտահայտված են գրաֆիկական աշխատանքներում, որտեղ նկարիչը պատկերել է Արզնիի ռազմական հոսպիտալում բուժվող վիրավոր զինվորներին եւ բուժքույրերին, Մոսկվայի, Կիեւի կառամատույցներում խռնված մարդկանց եւ զինվորականներին, ինչպես նաեւ Ստալինգրադի ավերակները: Ցուցադրվող աշխատանքները վկայում են այն մասին, որ նկարիչը նույնիսկ պատերազմի տարիներին հավատարիմ էր այն սկզբունքին, որ մահը պետք է հաղթահարել ապրելով եւ կյանքն արժեւորել մարդկանցով։ Եվ պատահական չէ, որ հենց այդ տարիներին է ստեղծել իր ժամանակակիցների մի ամբողջ պատկերասրահ՝ Հովսեփ Օրբելի, Կարո Հալաբյան, Ալեքսանդր Սպենդիարյան, Հրաչյա Աճառյան, Ստեփան Զորյան, Արամ Խաչատրյան, Հովհաննես Իսակով, Հովհաննես Բաղրամյան եւ շատ ուրիշներ։
Ցուցահանդեսը կգործի մինչեւ մայիսի վերջ։
