«ՎիվաՍել-ՄՏՍ»-ը՝ «ՄՏՍ» ԲԲԸ դուստր ձեռնարկությունը տեղեկացնում է, որ երեկ Կարիերայի զարգացման ծրագրի շրջանակներում, ընկերության գլխավոր տնօրեն Ռալֆ Յիրիկյանը ելույթ ունեցավ Միջազգային տնտեսական հարաբերությունների համալսարանի ուսանողների առջեւ: Ռալֆ Յիրիկյանն ուսանողներին ներկայացրեց կառավարման մշակույթի իր տեսլականը:
Դասախոսության ընթացքում, որին մասնակցեցին համալսարանի բոլոր ֆակուլտետներից 150 ուսանող եւ դասախոս, «ՎիվաՍել-ՄՏՍ»-ի գլխավոր տնօրենը ներկայացրեց ընկերությանը հաջողության բերած ուղին եւ այդ ուղու վրա հանդիպած մարտահրավերներն ու բարդությունները, որոնք հաղթահարելով՝ ընկերությունը կարճ ժամանակում դարձավ երկրի առաջատար ընկերություններից մեկը: «Ուղին դյուրին է, երբ կա համապատասխան կամք: Մեր ընկերությունն իր գործունեությունը սկսեց մեկ աշխատակցով, որը ես էի: Սեփական ուժերի նկատմամբ հավատը, սակայն, օգնեց շատ շուտ հավաքել նվիրված մարդկանց մի խումբ, ովքեր վճռական էին երազանքն իրականություն դարձնելու հարցում: Միասին մենք կառուցեցինք այն ընկերությունը, որը տեսնում եք: Այսօր մեր աշխատակիցների՝ «ՎիվաՍել-ՄՏՍ» ընտանիքի անդամների շնորհիվ, մենք Հայաստանի առաջատար բջջային օպերատորն ենք: Նրանք են մեր ընկերության ամենաթանկ կապիտալը»,- նշել է «ՎիվաՍել-ՄՏՍ»-ի գլխավոր տնօրենը:
