Երեկ բացվեց Երկրորդ համաշխարհային պատերազմի ժամանակ զոհվածների հիշատակման եւ հաշտեցման օրվան նվիրված ուսանողների աշխատանքների ցուցահանդեսը, որը կազմակերպել էին ՄԱԿ-ի հայաստանյան գրասենյակն ու Երեւանի արվեստի պետական ակադեմիան: Արվեստի ավելի քան 100 աշխատանքներ, ներառյալ՝ գեղանկար, գծանկար, բատիկա, գոբելեն եւ խեցեղեն, քանդակներ, ցուցադրվել էին ՄԱԿ-ի գրասենյակում եւ գրավել ուսանողների, դասախոսների, միջազգային համայնքի, քաղաքացիական հասարակության, լրատվամիջոցների եւ հանրության ուշադրությունը: «ՄԱԿ-ի գրասենյակում իրենց աշխատանքները ցուցադրելու այս նախաձեռնությունը մեծ հնարավորություն է երիտասարդ նկարիչների համար: Այն ոչ միայն խրախուսում, այլեւ հզորացնում է նրանց»,- ասել է Երեւանի արվեստի պետական ակադեմիայի ռեկտոր Արամ Իսաբեկյանը:
