Երեկ մարդու իրավունքների պաշտպանը դիմել է ՀՀ վարչապետին՝ կապված ապրիլի 27-ին ՀՀ Ազգային ժողովում առաջին ընթերցմամբ ընդունված «ՀՀ աշխատանքային օրենսգրքում փոփոխություններ եւ լրացումներ կատարելու մասին» ՀՀ օրենքի նախագծի հետ: Օմբուդսմենը հիշեցնում է, որ համաձայն ՀՀ նախագահի 2007թ. հուլիսի 18-ի ՆՀ-174-Ն հրամանագրի 42-րդ կետի, մարդու իրավունքներին եւ ազատություններին վերաբերող օրենքների նախագծերը նախքան կառավարություն ներկայացնելն ուղարկվում են ՀՀ մարդու իրավունքների պաշտպանին՝ կարծիքի: Նա նաեւ հայտնում է, որ վերոնշյալ նախագիծն անմիջականորեն վերաբերում է մարդու հիմնարար իրավունքներին եւ ազատություններին՝ աշխատանքի ընտրության ազատությանն ու աշխատանքային իրավունքների ու ազատությունների երաշխիքներին, սակայն չի ներկայացվել ՀՀ մարդու իրավունքների պաշտպանին՝ կարծիքի: Ա. Հարությունյանը խնդրում է միջոցներ ձեռնարկել, որպեսզի նախագծի երկրորդ ընթերցումը ՀՀ Ազգային ժողովում տեղի ունենա սույն թվականի հունիս ամսից ոչ շուտ, ինչը հնարավոր կդարձնի իրենց կողմից նախագծի վերաբերյալ դիտողություններ ու առաջարկություններ ներկայացնելը:
