![\"\"](\"https://www.aravot.am/2010/aravot_arm/May/8/p5.jpg\")
Ինչպես Հայաստանի այլ մարզերում, Գեղարքունիքում նույնպես նշվելու է Երկրորդ աշխարհամարտում տարած հաղթանակի 65-րդ տարեդարձը: Ինչպես տեղեկացանք Գեղարքունիքի մարզպետարանից, ի տարբերություն այլ մարզերի, Հայրենական մեծ պատերազմում տարած հաղթանակի 65-րդ տարեդարձին նվիրված միջոցառումների կազմակերպման մարզային հանձնաժողովը որոշել է մայիսի 9-ին, ժամը 22-ին՝ մարզի բոլոր համայնքներում հրավառություն տալ:
Բացի հրավառությունից, բոլոր վետերանները մեծարվելու են, ստանալու են հուշամեդալներ, դրամական խրախուսանք, վետերանների պատվին տրվելու է ճաշկերույթ: Մարզում գտնվող ՀՀ զինված ուժերի զորամասերի աջակցությամբ կազմակերպվելու են զինվորական շքերթներ:
Մեծ հայրենականի մասնակիցները այսօր 90-ին մոտ են եւ նրանց մի մասը առողջական խնդիրներ ունի ու չի մասնակցելու հանդիսություններին: Սա նկատի ունենալով էլ, Հայրենական մեծ պատերազմում տարած հաղթանակի 65-րդ տարեդարձին նվիրված միջոցառումների կազմակերպման Գեղարքունիքի մարզային հանձնաժողովը որոշել է՝ համայնքների ղեկավարներն անձամբ կայցելեն վատառողջ եւ սակավաշարժ վետերաններին ու կհանձնեն նրանց պարգեւները:
