Կառավարությունը իր պահուստային ֆոնդից 31 միլիոն 650 հազար դրամ է հատկացրել Նուբարաշենի թունաքիմիկատների գերեզմանոցի ծածկի, ջրահեռացման համակարգի եւ ցանկապատի վերականգնման նախահաշվային փաստաթղթերի մշակման եւ այդ աշխատանքների իրականացման համար: ՀՀ վարչապետ Տիգրան Սարգսյանի հանձնարարությամբ, ՀՀ արտակարգ իրավիճակների, գյուղատնտեսության եւ բնապահպանության նախարարությունները պատրաստելու են համապատասխան որոշում, որով առաջիկա 6 ամիսների ընթացքում թունաքիմիկատների ոչնչացման գործընթացին վերջնական լուծում է տրվելու:
Գործընթացի շրջանակներում գյուղատնտեսության նախարարությունը հակահամաճարակային միջոցառումներ է կազմակերպելու: Կառավարության երեկվա նիստում Տ. Սարգսյանը նշեց, որ խնդիրը գտնվում է նախագահի անմիջական հսկողության տակ: ՀՀ արտակարգ իրավիճակների նախարար Արմեն Երիցյանն էլ ասաց, որ նախարարությունն արդեն բանակցություններ է սկսել միջազգային կազմակերպությունների եւ դոնոր երկրների հետ՝ ֆինանսավորելու թունանյութերի ոչնչացման գործընթացը:
