Այս օրերին ՀՀ քաղաքացիներին շատ է հետաքրքրում, թե անընդմեջ տեղացող անձրեւները ե՞րբ են դադարելու: Երեկ այս առիթով «Հայպետհիդրոմետի» օդերեւութաբանական ծառայության պետ Զարուհի Պետրոսյանը ասուլիս էր հրավիրել՝ հայտնելով, որ գարնան շունչը մեր հանրապետությունում կզգացվի միայն մայիսի 10-ից հետո: Ըստ տիկին Պետրոսյանի, ջերմաստիճանը կսկսի բարձրանալ մայիսի 7-ից հետո, բայց առայժմ 25 աստիճանը չի գերազանցի: Վատ լուրն այն էր, որ այսօրվանից պետք է տեղումներ սկսվեն եւ շարունակվեն մինչեւ մայիսի 5-ը՝ մեկումեջ դադարով: Ծառայությունը նաեւ ամռան եղանակն էր կանխատեսել. ամռանը տեղումները հունիս եւ հուլիս ամիսներին նորմայից պակաս են լինելու, իսկ օգոստոսին՝ նորմայից ավելի: Ամռանն օդի ջերմաստիճանը նույնպես կդիտվի նորմայի սահմաններում:
